豬流感喺日本擴散，日股噚日跌200幾點，如果感染豬流感嘅人數大增，日股調整嘅壓力會加大，到時區內股市氣氛可能會受影響，大家要留意。
港股噚日先跌後升，恒指重越17000關，升咗232點，不過成交唔算好大，暫時仲係上落市，不過好多股份都有炒作，短線搵股炒唔難。
中鐵C輪15738：中鐵（390）噚日報收5.82元，升5.2%，成交大幅增加，10日線同20日線都升番上條250日線樓上，個勢好好，可以買啲C輪15738，博正股升上7.50元。
隻輪現價24.8仙，2011年4月28日到期，行使價5元，溢價28.5%，引伸波幅68.7%，槓桿率2.3倍（有效1.7倍），正股升上7.50元，15738睇38仙，正股跌穿5.10元，就沽咗隻輪止蝕。
俊樺