車仔領隊軒迪克周日最後一次主場亮相，全場車仔球迷狂呼：「留低！」老江湖軒帥嘴唇顫動，幾乎喺史丹福橋「流馬尿」作留念。我求大俠第朝睇到AC米蘭教練肥安承認上「車」嘅新聞（本月30日落實），當堂呆咗一陣，但好快就明白其中原由。
投車仔4年賺2.7億
呢單嘢從管理角度睇冇唔妥，車仔老細阿巴同肥安仲係絕配㖭！阿巴遺留土共嘅霸道病毒，球隊成績好時，會學似胡、溫咁慈祥同民主；成績一差，佢不但即時變臉，狼起上嚟話清場就清場，摩連奴、格蘭同史高拉利都係好例子。
肥安卻係典型擦鞋仔，周身肥膏任老細亂篤亂搣亂揑，都唔會哼一聲。好似咁多年嚟同AC打工，老細貝盧斯科尼話鍾意雙前鋒，佢就嗱嗱臨摺埋個聖誕樹陣式；男性荷爾蒙流失之快，就連老婆畀綠帽佢戴，都唔識發火啦！
簡單嚟講，阿巴係凸，肥安就係凹，一齊自然「耷耷陷」！唔怪得阿巴肯開4年2,600萬歐元（約2.7億港元）嘅合約畀肥安，除番年薪高達650萬歐元，比AC嘅人工多出近百萬歐元，肥安仲唔貼埋大床都要嫁過去倫敦咩？
從足球角度考慮，對歐聯獎盃近乎癡狂嘅阿巴，對歐聯戰績為兩冠一亞嘅肥安，自然嗒晒糖。不過，阿巴就唔清楚AC目前青黃不接，亦係秉承唔做唔錯原則嘅肥安一手造成；由佢嚟教逐漸老化嘅車仔，我求大俠唔敢樂觀囉！
肥安願意去史丹福橋，其實正中AC下懷。當初車仔未正式搵肥安，副會長加利安尼已經放風推波助瀾，月初貝老更公開批評肥安係球隊罪人；車仔仲出咁嘅條件斟肥安，可見阿巴依然係球壇頭號提款機。
尹巴士頓或教AC
AC應該好快會宣佈名宿尹巴士頓為未來教練，周日老尹仲同泰索迪、加里等打高爾夫球，之後一齊食飯傾足幾粒鐘；咁啱呢兩位前隊友喺AC擔任助教等職位，咁大家明白AC一直睇住肥安同車仔嚟食啦！