到文華東方酒店二十五樓法國餐廳Pierre食午餐，十分清靜，金融海嘯之後遺症，確實揮之不去。唔好以為呢度好貴，中午時份所有高級餐廳都力求克己，盡量吸引食客。Pierre有午餐套餐（setlunch）之設，售三百六十元，喺中環好有競爭力啫，喺中環甚至香港嘅最佳酒店吃餐噃。
吃到兩點幾，匆匆趕去歷山大廈之星巴克，與傳媒編導及攝影師見面，商量如何拍一套十分鐘短片。星巴克就唔同嘞，坐滿人，幾乎搵唔到空位，好彩攝影Y與編導C老早買定咖啡，佔到好位，可以慢慢傾。茶都未飲啫，已見到幾位旅遊界名人行入嚟搵位，即刻與佢哋打招呼，專營出外與遊學團嘅H先生呻到樹葉落，話豬流感打擊旅遊業極大，外出遊學團紛紛取消，專營inbound（來港）旅遊嘅W先生同樣吐苦水，話維景酒店一役，香港成功，但外來旅客不斷取消行程，令佢心慌慌，佢哋話五月份旅行社生意可能跌七八成，業界實在撐得辛苦。
旅遊業本來開始踏入旺季，想唔到甲型流感H1N1橫腰殺埋嚟，令業界措手不及，果真係「黑天鵝事件」，唔通又要政府派錢救援？曾特首與曾司長有得幾多錢可派？傾完短片，返到寫字樓睇電視，剛好係吳靄儀提問六四，曾特首答得好小心，點知講多咗一句「我代表香港人的整體意見」，左丁山大叫「大件事」，果然，泛民派羣起而攻之，搞到集體離場，恐怕曾特首靠抗疫贏到嘅六點民望調升，會付諸流水，要重新嚟過，一個月內派糖已屬必然，希望派糖可以保住民望不跌啦。
睇完電視就趕去香港會應下午茶之約，大馬路上政府合署西翼旁之斑馬線，見到一位貌似長者婦人，滿臉脂粉，一身打扮，過馬路逐步逐步行，十分緩慢，左丁山在後睇到，好驚佢會跌倒路上。衝到去太子行過馬路，咦，一位精壯男士就在前面，打扮入時，行路輕鬆爽快，乃議員T也，梗係開完立法會之後，趕去其他約會啦。見到議員T，就醒起嗰位長者婦人是誰，不禁嘆一句，紅顏悲白髮，俊士喜嬌花，行事隨遇而安，心理會輕鬆一啲。