《蘋果》以前報道過幾個重建區街坊嘅故事，其中深水埗福榮街、興華街一帶嘅K20-23重建區，有位叫黃乃忠嘅街坊，喺嗰度經營家傳嘅傳統花牌紮作生意，仲收養咗幾隻流浪貓仔。八方聽聞，成個重建區嘅住戶、商戶都已經搬走晒，剩番忠哥一個堅持留守到最後一刻。文化界開始聲援忠哥行動，梁文道發起聯署，小說家董啟章仲形容忠哥係唐吉訶德，以一己之力，挑戰房協。
網站聯署抗爭到底
一班街坊之前曾經提出留底方案，又設飯局宴請林鄭，希望喺發展之餘度吓點保存番個社區，但都冇用。忠哥惟有喺政府告佢霸佔官地嘅官司中，由李柱銘代表佢提出，政府冇依足法例評估對居民嘅影響係行政失當，收地係違法。官司結果輸咗，但忠哥已經提出上訴。據講，房協已作好兩手準備，一方面催忠哥開條件和解，放棄上訴，一方面又報請執達吏準備收樓。梁文道噚日喺「獨立媒體」網站發起「要抬黃乃忠，就連我們一起抬」聯署，揚言如果房協要將忠哥抬走，佢哋一班一直跟進呢件事嘅街坊同義工會陪住忠哥，抗爭到底。