股票市場係一塊英雄地，投資推介有冇料，遲早會現形。星俠自問唔識睇內房股，好多散戶不時問星俠點睇呢個板塊股份？星俠都話唔識睇。
不過，散戶亦要明白唔識睇唔代表唔識炒，近期內房股百花齊放，炒得令人如癡如醉，好似合生創展（754）雖然早輪傳出過負面消息，但市場好快就唔記得，該股2月初低位2.38元，家陣股價高過10元，累計升幅逾3倍幾。
另外，星俠上個月都有提過的中渝置地（1224），今年3月初股價仲喺1元邊，家陣都已升至3.87元，兩個月時間累計升幅亦達3倍。
有望脫離仙班
中渝升幅咁勁，所謂同氣連枝，持有該股11.74%權益的渝港國際（613）好難令人唔望多兩眼。中渝股價爆升，渝港走勢亦步亦趨。
渝港所持中渝權益，若以現價計接近10億元，高過渝港本身市值。炒渝港脫離「仙班」有可博之道，渝港上周五收0.084元，升9%，伺機短炒，以0.069元止蝕。
方星俠