膠人膠語唔緊要，膠膠吓膠埋其他人就罪無可恕！前幾日煲呔話香港人沾咗祖國咁多油水，評論六四應該客觀啲，呢啲是非不分嘅講法充份體現煲呔為人，向來EQ低落嘅佢，被長毛問多兩問仲把持唔住開始語無倫次，話自己代表香港人，嚇到八方唔少朋友話要移民，煲呔威力咪話唔勁！
當日作者 今日為官
好彩，歷史唔係是但噏，64位前線記者當年親身經歷民運，親眼見證屠城，回港之後寫咗本《人民不會忘記》，成為血洗京城嘅第一手紀錄。今年正值六四20周年，呢班有心人希望今日嘅小朋友、我哋嘅下一代認清史實，於是重印《人民不會忘記》。當年呢本書嘅作者，仲包括今時今日係政府一員嘅新聞統籌專員何安達、行政長官辦公室高級特別助理陳建平、環境局副局長潘潔、運輸及房屋局副局長邱誠武。
八方噚日去咗《人民不會忘記》重印發佈會湊熱鬧，上述幾位冇現身。有行家問主持發佈會嘅編委黎佩兒會唔會送番一兩本畀扮人民代表嘅煲呔？黎佩兒反問，咁做有冇作用？佢話本書白紙黑字，真人真名去寫，係記者們當年採訪番嚟嘅真實資料，大膽講算係歷史一部份，好難得同好珍貴，「一兩本都唔使好多錢，要送都冇乜所謂，不過我覺得佢都會買嘅。」現場即刻有人建議，不如叫何安達送本畀煲呔惡補。
黎佩兒話，出版前曾經聯絡大部份作者，絕大部份都好支持重印，冇收到反對聲音。八方噚日想問吓邱武點睇出書呢單嘢，但佢冇覆電話。
至於今日貴為立法會議員「老鼠芬」嘅梁美芬，當年都做過吓記者，本書亦有佢寫嘅文章，講當年學生經過幾番掙扎，終於走上街頭，佢當日寫話學生「向全世界顯示要求民主的決心，為中國民主運動翻開了新的一頁。」家睇番依然令人振奮，但今時今日老鼠芬居然鬧泛民每年提出平反六四議案變咗口號，係為某啲人賺取政治本錢，完全係隱形左派中堅嘅口脗。
老鼠芬嘅助手就話，梁議員噚日全日都有活動，好忙，所以冇去發佈會，但助手有代表佢出席，仲買咗幾本書留念。本書嘅收益會捐畀「人民不會忘記」基金，要嚟促進中國同香港新聞自由。咁都好，可以間接幫老鼠芬積番啲陰德。
mailto:[email protected]