「Cheers!」恭喜曼聯連續3季贏得英超冠軍，仲以18個英格蘭頂級聯賽冠軍同利記平起平坐！一眾職球員飲飽食醉後，各自內心各有盤算同心願，我求大俠即管幫大家分析吓。
費Sir反口玩多5年？
首先係領隊費Sir，卜比查爾頓形容佢係「最偉大領隊」，卜比笠臣就話佢應該玩多幾年，大家都知費Sir曾爆響口2011年退休，呢位老人家仲唔乘機再向老闆格拉沙施壓咩？佢上周六話要超越利記嘅聯賽冠軍紀錄，《獨立報》同《每日星報》就踢爆費Sir借醉反口：「可能教多5年！」
朗尼就愁眉深鎖喇，《世界新聞報》話呢位前鋒為禿頭而煩惱，打算食藥控制男性荷爾蒙。據講朗尼一早想試呢隻藥，以前禁止運動員使用，但家合法又點會錯過？不過我求大俠聽聞500人服用呢隻藥會有一個出現乳房增大，第日落場個胸拋拋吓咪仲肉酸？三思呀！
馬捷達未夠秤冇酒飲
泰維斯同基斯坦奴朗拿度（C朗）就着緊前程。上周六賽後有球迷擲水樽同噴啤酒，要求球會簽泰維斯，不過呢位阿根廷球星喺奧脫福重申：「多謝球迷，可能要byebye啦！因為好難留低。」C朗就收到一剔牌一紙1年600萬鎊（約7千萬港元）嘅超級贊助合約，不過咁會成為加盟皇馬（三間牌）嘅障礙，睇吓佢要錢定要自由喇。
上周六曼聯「開P」豪飲，惟獨唔見17歲新星馬捷達，原來佢未夠秤入夜店，早就坐的士返屋企。不過最失意係佢今季得3次聯賽上陣，由於1隊成員太多，冠軍獎牌唔夠派。費Sir已經要求額外獎牌，等馬捷達、賓科士打、布朗同韋碧克都有番個牌留念，咁馬捷達唔使唔開心啦！