一人一票真普選係世界潮流，連基層警務人員嘅組織警察隊員佐級協會（JPOA），都有會員爭取改革選舉制度，要求一人一票選主席。
八方聽聞，喺警察非官方網站「警察俱樂部」，近日有網友指JPOA最近出現31年以來最大嘅內訌危機，因為在野派要求修改會章，畀會員一人一票選主席；執政派就反對改革，想維持只畀七個代表有權投票選主席。有會員仲話，今次兩派爭持激烈，如果講唔掂數，隨時會搞到協會分裂成兩個會，變成JPOA同JPOB喎。
協會主席鍾錦華同八方講，確有小部份會員要求改選舉制度，會方會跟足會章按機制開會討論。家JPOA由兩萬幾會員選出區代表，區代表再選七個總區嘅執委，再投票互選主席。