無綫總經理陳志雲愛將崔建邦鍾意蒲夜店，近日又被指背住女友唐詩詠夜蒲女。不過呢次媾女事件並冇辣㷫唐詩詠，佢仲幫男友崔建邦向傳媒解畫，馮仁昭知道呢對小情侶近年經歷過唔少風波，感情好穩固，唔係話散就散，加上佢哋中間有陳志雲幫手做萬能膠，將佢兩個黐到實一實，打風都打唔甩。
崔建邦噚日同陳志雲喺黃大仙食齋，傾無綫J2台新節目嘅詳情，唐詩詠就做跟得女友，以行動證明感情冇受偷食事件影響。陳志雲仲安排崔建邦同唐詩詠坐埋啲，畀記者影相。
唐詩詠話百分百信任男友冇偷食，佢話：「呢次偷影，崔建邦一早同我講咗，我咪當笑話一則，每個人都有私人空間，我唔會阻止佢夜蒲，但我會要求佢檢點啲，唔好次次都要我幫佢開咪回應，我同佢講下次再俾人影到，佢要負番責任。」
邦邦否認摷女伴袋
崔建邦就否認有摷女伴手袋，陳志雲亦話崔建邦冇喺佢身上學到口才媾女。邦邦有情人同知己雙劍合璧撐腰，唔怪得笑得咁風騷啦！