彤叔鄭裕彤開金舖，佢女婿、新創建（659）副主席杜惠愷，原來係國際知名嘅鑽石專家。今期新世界發展嘅內部刊物《新語》中，就有杜惠愷嘅訪問，仲登咗佢細個同年輕時嘅相。
見識世界學謙虛
話說由於家族從事珠寶生意，所以當杜惠愷先後喺加拿大多倫多大學同美國加州大學，完成學士同碩士課程後，就走去專修珠寶鑽石專家鑑別。佢喺訪問度仲話，讀完美國寶石學院鑑別文憑後，到比利時安特衞普（Antwerp）一間鑽石工廠實習半年，跟住聽阿爸話，喺歐洲留多3個月見識吓。
就喺咁，杜惠愷嘅足迹遍及比利時、法國、摩洛哥、中國等地。杜惠愷話，爸爸同佢話身為潮州人，鄉下自然資源唔多，祖先好窮，所以做人要刻苦，唔好睇小自己，亦唔好睇小人。
佢自己去過咁多地方，亦領會到有啲人成就好高，可能因為天時；有啲民族比較興盛，可能因為地利，天時地利人和各有原因，所以做人咪恃才傲物，更加唔可以恃財生驕，睇唔起窮人。