旺角行人專區前日再有狂徒掟鏹水彈，傷及途人。公民黨毛孟靜噚日落去案發現場隔籬搞「我要回家」論壇，請嚟協助流亡海外民運人士嘅朱耀明牧師同班大學生分享。毛孟靜話佢同班義工都心驚膽顫，但為咗爭取平反六四，惟有頂硬上。
另一邊廂，煲呔噚日亦落旺角，朝早11點幾去案發現場一帶視察，似乎想挽回日前喺六四問題上「扮代表」而被輿論狂插嘅局面。有心水清人士指出，上次旺角鏹水彈案發後，煲呔下晝3點左右落去，事後一個問題都唔答就閃；噚日提早蒲頭，時間上避開公民黨呢個3點開始嘅六四論壇，究竟有心定無意，八方就唔敢「扮代表」代煲呔答喇。