金融市場似漸趨穩定，英國財政部開始對早前出事嘅銀行，醞釀一連串「秋後算賬」行動。未落台嘅銀行高層固然有機會被開刀，就算落咗台嘅都被開「快勞」調查，隨時有手尾跟。
蘇皇前CEO被查
早前因收購荷蘭銀行出事嘅蘇格蘭皇家銀行（RBS），佢哋前行政總裁古德溫（FredGoodwin）雖已為事件落台，不過據《英國電訊報》講，英國政府已委託羅兵咸永道，調查包括古德溫在內嘅RBS前董事，了解佢哋喺風險管理等方面有冇失職，似乎麻煩仲未斷尾。佢喺愛丁堡嘅豪宅3月俾激進分子掟磚破壞，家吓又被調查，睇嚟古德溫有排都冇覺好瞓。
萊斯主席將離任
同樣因收購出事嘅萊斯銀行（Lloyds），因為買咗HBOS毒資產而陷入財困，要政府出手打救，雖然萊斯主席布蘭克（VictorBlank）同首相白高敦份屬好友，到刻仍然在位，但一樣被列入秋後算賬之列。
《英國電訊報》話，布蘭克主席個位唔會坐得耐，佢老人家短期內會公佈頂盡喺萊斯坐多一年，萊斯方面將物色繼任人。
據講，布蘭克咁做，可以令佢避免喺下月董事會重選主席時出現尷尬情況，就算被清算落台，都較為體面咁話。