雖然呢排經濟有番啲起色，但裁員減薪之聲不絕於耳，小妹都好耐冇買名牌手袋，就算出街食嘢都要諗過度過。
早幾日同元氣壽司嘅總經理Ernest聚一聚，佢話家巿民消費都好精明，又要好食又要抵食，喺咁嘅大氣候，元氣順應潮流推出咗「大滿足極上之選」優惠活動，出咗四款一件一碟超大嘅一味壽司，每件魚生等都要包得住成嚿飯，每件都係賣九蚊，其中一款池魚，仲係每朝由日本鹿兒島直飛嚟香港，即晚喺香港嘅元氣店有得食，夠晒鮮味。
遲啲再推三味壽司
營運總監康哥話，以前迴轉壽司傳統一碟兩件，一個人食一碟唔食得好多款，最好係兩個人分一碟，但又未必兩個都鍾意食同一款。家一碟食一款，一個人鍾意食乜就食乜，夠晒大滿足。
Ernest話，下月再推出多五款一味壽司，包括首創蟹肉三文魚子軍艦等。佢仲即時叫小妹試食九款一味壽司，笑笑口話，「食晒九件都係81蚊，喺中環啲日本餐廳要成幾百蚊。你話係咪抵食？」
Ernest講到咁開心，又透露遲啲會推出三味壽司。吓，壽司都有三味？
Ernest話，三味壽司啱啱喺日本興起，一碟有三件唔同壽司，但互相又有關連，可以考考顧客嘅食力，例如一碟會有三文魚、燒三文魚及燻三文魚等，畀啲顧客食一碟有唔同嘅感受。定價每碟會較散叫至少平一成。
電郵：mailto:[email protected]