不論係舊式古董定係由寶馬車廠接手後嘅型格新車，MINI都有着其獨特型格，令人一見難忘。眨眼間呢架車仔原來已經踏入五十周年壽辰，世界性嘅巡迴巨型生日派對又點少得呢。名為2009MINIUNITED嘅Party繼意大利及荷蘭之後，5月22-24日將會轉往老家英國，大會規劃了四個主題嘅遊樂區，更展示多年來嘅經典款式。若然大家有興趣參加呢個大派對，可上網訂票親身體驗。機票太貴又想睇？唔使擔心，記者將會親身到英國會場直擊，大家記住要密切留意。而MINIUnited門票則可於以下網址訂購：http://www.miniunited.com
期待MINISUV
要留意嘅又豈止一個派對咁少，另一樣令人期待嘅盛事，應該係MINI嘅全新概念車MINICrossover，曾經喺各大車展上亮相嘅呢部SUV，早就喺網上掀起熱烈討論。據官方資料透露，呢架全新MINICrossover概念車係MINI首次採用超過四米嘅車身長度、四輪驅動以及四個獨立座位，望落雖成功保留MINI外形，但實質喺車身比例及線條設計上都起了極大變化，令外形變得更結實、強壯，而內櫳嘅超現實設計一樣叫人嘩嘩聲。最興奮消息：聽聞呢架新車有望於今年年底推出市場，無論係唔係MINI迷，都肯定引頸以待。
記者：許維雅