看通（1059）貼近沙士價，月線圖9RSI都係得28，博超級大落後，看通又係抵搞。呢期資金蜂擁細價股，好多股仔翻咗一兩番，月線圖RSI上番50中軸樓上。睇番看通，現價（0.173元）仲喺近5年低位上上落落，中長線超賣，殘到不得了。
同好多企業一樣，受到金融海嘯影響，看通09年半年度（12月底止）純利，都倒退咗42%，到1.2億銀。但要咁睇，就算集團全年度純利，只係keep到半年度水位，PE都係得5字頭單位數。加埋集團主打祖國市場，中線復蘇速度會快好多。看通呢期啱啱搞掂4供1集資，連攤薄效應計，NAV0.574元，現價折讓上到近70%，吸引到極。而連埋供股集資後，看通淨現金應該達到1.8億銀，講基本質素，肯定唔曳。當炒落後，博看通翻半番到0.26元，到時嘅折讓，仍然高企50%樓上，實情仲有大把收窄空間。
泛海折讓大得離譜
泛海集團（129）現價8.4仙，比起03年沙士最低位0.204元，仲要跌多近60%。連酒店資產重估後，泛海NAV0.56元，現價折讓高達85%。呢期報載，泛海喺南區嘅「南灣御園」，月初至今累售60伙，剩番100伙，每伙最低入場費470萬銀。計計數，齋計呢批單位，若果全數出售，泛海已經可套現7.5億銀，泛海本身市值都係9.5億銀咁大把，實情殘到痹。泛海係咁易翻半番到0.126元，折讓仲係講緊77%過外，又真係有啲離譜。
錢雋