豬流感殺到，市民怕中招狂掃消毒洗手液同口罩，令抗疫物資一度斷市，政府撥款資助各區議會買防疫物資派畀市民，但派嘅竟然係次貨。
八方收到風，指九龍城區議會日前向居民派抗疫包，入面有抗疫三寶：消毒濕紙巾、洗手液同噴霧，但街坊拆開包嘢，卻發現有幾支抑菌噴霧原來已過期，如果冇為意用嚟消毒，殺唔到菌隨時一身蟻。
當局發現唔妥，即時收起支噴霧，仲貼大字報呼籲街坊睇清楚支抑菌噴霧有冇過期，如果已經過期，就千祈咪用，同埋可以向區議會換過支新嘅。
呢次唔係派抗疫包首次鬧出笑話，以前試過派漏口罩，抗疫如此蝦碌，真係令人擔心防線又再失守。