上期〈救生圈〉成績麻麻，不過總算中到愛隊祖雲達斯個5.3倍[和/和]。今期同至愛嘅石兄拍住上，頭關我先推介日乙，要富山勝利作客贏甲府風林，4.9倍W夠晒好分。
甲府風林雖則喺日乙超班，但大家見唔見到佢哋近排攻力弱咗好多？成日只係入得一粒就冇貨賣。查實甲府風林近期大鬧「前鋒荒」，前田雅文、久野純彌同巴西射手般奴阿歷山大都因傷缺陣，聽聞暫入3球嘅南韓射手金信泳都好有可能缺陣，有冷味。富山勝利勝在可「夫添」，近6場4勝1和1負唔係講笑，就吼個4.9倍冷W，半全場要11倍[和/客]。
吼阿特蘭大「半勝」
配腳揀番場同〈早飛2+5〉推介一樣，要些路迪作客小勝喜伯年，開[-1]嘅3.5倍「和局」。蘇超去到爭標階段，梗係捧啲有實力同經驗嘅球隊，些路迪有咁多主力復出，贏波冇問題。講真，喜伯年上場輸唔到俾格流真係靠晒球證，但睇番佢哋近年主場對些軍硬淨兼好少大敗，「和局」啱啱好，要同樣補埋4.1倍[和/客]。
最後一關再揀愛隊祖雲達斯，半場要佢哋落後阿特蘭大。早排祖記球迷因為對敵方種族歧視，搞到球隊今場主場要閉門作賽，變相冇晒球迷支持；再睇「老婦人」近8場波，竟然有5場上半場俾對手領前，連萊切、拉素同基爾禾都試過喺度開「半勝」。好！阿特蘭大個「半勝」有8倍，去馬。
文：畢傑