【本報訊】「啱啱踏出馬路，兩個樽就跌咗落嚟，其中一個喺我面前4米遠爆開，見到好多人受咗傷。」旺角西洋菜南街鏹水彈空襲事件，其中一對受傷姓劉夫婦正在上址「行街Shopping」，因為行人路上太多人，兩人被迫走出劃作行人專用區的馬路，結果被四處飛濺的鏹水濺中，「好多人受咗傷，但場面冇想像中混亂，冇人慘叫，冇人嗌救命，嗰一刻，大家好似都知道發生咗乜事，跟住好多人攞住水樽出嚟救人。」
被迫走出馬路遭殃
手腳及頸部灼傷的劉先生，事發後與另外15名傷者被送到伊利沙伯醫院接受治療，昨晚出院時仍穿着病人衣服，「醫生話我傷勢唔算嚴重，可能會甩皮，不過件T恤就揦穿咗，差人話要攞去做化驗。」他向記者說，事發時正與妻子逛街經過上址，因為行人路太多人，被迫走出馬路。
「當時有液體濺過嚟，初時唔覺得揦。」劉說，他定了定神後，見到眼前有多名男女受傷，大家都奔向行人路，他連忙扶着妻子跑至路邊，「好多店舖嘅職員攞住水樽出來救人，大家用水冲身。」劉形容當時的場面沒有想像中混亂，亦無人痛哭大叫，「經歷過上一次，大家都好似知道發生乜事，好冷靜。」
他說，自從去年的鏹水彈事件後，他兩夫婦每次到旺角都特別小心，「我哋通常都揀有瓦遮頭嘅行人路，今次偶然行出馬路就中招，真係無妄之災。」
現場附近一家連鎖電器店的職員向記者說，事發時店內有很多客人，突然有一名送外賣的男子跑進店內，說了一句：「又有人揼嘢落嚟」，話音剛落，一大批男女便衝入店內躲避。