立法會訪粵考察團噚日柴娃娃出發，泛民議員帶齊「見面禮」同內地官員見面，真係未出發先興奮。出發前幾個無證議員只獲發一次性回鄉證，心情忐忑唔知過關是否順利，抵達邊防口岸果然出事。
據白鴿黨高達講，抵達口岸時，有邊防人員上旅遊巴為佢哋辦過關手續，成班人唔使落車好他條，點知何秀蘭卻忽然咳咗幾聲，搞到全車人，包括邊防人員大為緊張，即時幫佢量體溫，測吓係咪疑似豬流感。
唔知係心情興奮太緊張，定係好似啲高官咁，見到五星旗就熱血沸騰，初次量度竟然略為超標，後來再度先確定正常，順利入境，否則因為咁要隔離成班議員，隨時又鬧出政治風波！