幾個月前曾撞車嘅亞視主播陳興昌，噚日又遇血光之災，佢拎住六點鐘新聞條片，狂奔100米送去控制室時跌低，左邊面猛撼埋牆即時爆缸，眼鏡都撞斷，要送院治療。
事發噚日傍晚5點幾，距離六點鐘新聞仲有三分鐘時間，陳興昌趕住將剛剛剪輯好、講本地生產總值大跌嘅頭條新聞片，由剪片室送去直播控制室，可能太心急忽然跌倒，由於傷勢唔輕，陳興昌要去醫院包紮，新聞小花李卓敏亦有去醫院探佢，八方聽聞有女同事更緊張到喊。好彩阿昌冇大礙，佢話今次衰論盡。
有亞視中人話，由於勁裁員，新聞部係重災區，記者採訪、剪片連送片一腳踢，真係鐵打都頂唔順，做到腳軟一啲都唔奇。