呢期最hit嘅應該係《巾幗梟雄》！好多人趕唔切返屋企睇，都要上網追埋先瞓得安樂，不過噚晚收視可能差少少，因為唔少人去咗記協一年一度籌款晚宴。記協晚宴年年都有精采籌款節目，今年重頭戲係立法會議員葉劉處女行catwalk，同匯賢智庫拍檔史泰祖醫生踩上天橋，親身演繹本地設計師作品。
透視晚裝全場嘩然
葉劉做官時衣着品味有目共睹，近年一改形象令人耳目一新，佢噚晚先後着上兩件晚裝出場，一件係白色荷葉領公主裝，另一件係綠色雪紡透視露背晚裝，一現身全人類嘩然。葉太初次做model，自言冇刻意特訓瘦身，噚晚表現得唔係幾自然。
為記協籌款，葉劉仲捐出一支82年法國紅酒ChateauHaut-Brion拍賣，由「廚神」黃坤以三萬蚊投得，醫管局主席肥胡飲恨。史泰祖笑言自己平日衣着好老土，噚日係生平第一次着得咁潮，佢兩套衫一套係白馬王子外套襯灰色格仔褲，另一套係皮上衣，佢表現比較輕鬆，有人笑佢似謝老四！
除咗時裝表演，立法會議員梁美芬、梁家傑，同埋前新聞王子李燦榮、新聞之花繆美詩一齊做趣劇，香江文化交流基金會主席江素惠同工聯會會長棠哥就合唱情歌。
肥馬飛哥合作拍賣
晚宴另一高潮位係拍賣環節，由政壇老將飛哥搭前局長肥馬做「拍賣官」，兩人承諾會落力揼人心口，為記協籌款，一分一毫都揸到盡咁話。
記協成立41周年，今年咁肉緊籌款，都係金融海嘯累事。由於「筆直」所限，已由例牌嘅洲際酒店移師TheMira舉行，但今年賣枱成績都係麻麻，因為好多上市公司都冇往年咁豪氣，據講係因為要慳錢，用於畀面派對嘅應酬開支要就住使，否則一方面減薪裁員，一方面又豪花去ball，恐防惹來非議。
噚晚「散戶黃大仙」陸叔都有捧場，好多行家都問佢攞冧巴，陸叔有求必應，半推半就講出心水，話睇好內銀股，首選工行。佢笑成班行家平時寫稿、上鏡就叫師奶唔好掛住問冧巴，原來都係同道中人。冇計啦，生意淡薄，不如博博吖嘛！
mailto:[email protected]
