德甲仲有兩輪就玩完，雲達不來梅嚟到呢一刻先上力，周中仲作客大炒法蘭克福5:0，今日迎戰久降嘅卡爾斯魯厄，應該可以大數一場，就博佢哋用「主其他」嚟主場謝幕。
不來梅今季喺德甲打得好差，肯定入唔到前5名，好彩入咗歐協盃同埋德盃決賽，算係對球迷有啲交代。下周三佢哋會喺土耳其同烏克蘭嘅薩克達爭冠軍，今日對住喺德甲包尾嘅卡爾斯魯厄，肯定以寓賽於操嘅心態嚟踢。我唔認為佢哋會去得太盡，但問題係卡爾斯魯厄實在太屎，而且仲受傷停問題困擾，以主隊班攻擊主力好似係芬寧斯、奧斯爾、比沙路同埋曉高艾美達等嘅質素同埋狀態，要入半打真係冇難度，就揀「主其他」波膽。
「利華」主場差捧主/客
至於利華古遜主場對慕遜加柏，利華個主場拜耳球場因為有擴建工程，所以由下半季開始將主場比賽移師杜塞爾多夫嘅LTU球場舉行，但成績差到你唔信，10場成績係2勝5和3負，就算佢哋前線嘅希美斯同埋傑斯寧好「弗」，聯賽入咗成31球，都係好難捧得落手。慕遜加柏要搶分護級，肯定博老命，但作客成日失波先，就冷敲[主/客]。
日乙方面，札幌岡薩多雖然有射手達維過檔日職名古屋鯨魚，但基連奴狀態好好，12場聯賽入7球；而FC岐阜前鋒西川優大上場連中三元，睇嚟都有一定入球能力，就博主隊岡薩多贏3:2。
文：青蛙仔