上20年經典舊作《BionicCommando》，終於戰上PS3及XB360！睇主角拎住隻機械臂，在城巿間飛來飛去，做一個另類蜘蛛俠，殺得暢快、打得爽快；如自認技術有番咁上下，仲可以上網挑戰世界高手，最多支援8人連線大戰，絕對挑戰玩家技術，記得5.19上網開戰！
記者：許福合
機械臂邊打邊走
睇番資料，原來街機版《BionicCommando》早在1987年推出，不過因為玩法特別，令好多機迷仲有印象；其中最深刻當然係遊戲主角隻機械臂，利用機械臂按個掣，就會射出鋼索，只要勾住固定位置，主角就可以學似蜘蛛俠咁飛盪於大廈之間，如果唔係衣着完全唔同，可能有人會以為係新版蜘蛛俠！
主角NathanSpencer嘅機械臂除咗當作「交通工具」，原來仲係主要武器，機械臂射出鋼索可以射向汽車或見到嘅雜物，勾回來就可以擲向敵人；玩得殘忍啲！甚至抓起啲嘍囉小卒，除抓除掟，真係十步內幾乎下下索命；不過筆者更愛玩「嘍囉」流星鎚，俾人圍時用嚟解圍，真係攻守兼備！
網上挑戰8人連線
NathanSpencer除咗有條邪惡左臂，其實佢同好多FPS遊戲一樣，都配備有槍械；但遊戲初期武裝比較基本，對付小兵還可以，而且彈藥消耗量頗大，所以絕對要慳住用；其實埋身戰時，拳腳交都加入了一個鎖定系統，Lock住敵人嚟追打，唔會兩頭Fing，隨時好用過手槍㗎！
除單人版故事模式外，網上對戰模式同樣受關注，PS3及XB360分別可透過PSN及Live!挑戰世界高手，在進入網戰時，會見到用其他顏色標示對手，設計有啲似《Halo3》，會有多種勝出條件，不過如無意外最受歡迎都係殺人為主嘅死亡模式，誰可殺到最後就成為王者。
Profile
主機：PS3/XB360
遊戲類型：動作
遊戲人數：1-8人
開發：Capcom
推出日期：5月19日
售價：$328
查詢：i-Gamer（27253338）