老，對好多女人而言係大忌，但原來，車就可以越老越可愛。七十年代Celica，三十幾歲車齡，外表新嘅一樣之餘，仲別有味道。呢日仲全場都係呢類各有「姿色」嘅老車，有啲甚至已經絕迹馬路，呢陣「老」味，係由日本絕版車會兩歲「生辰」誘發，眼見近百部魅力不凡嘅舊款靚車，我對「老」呢個字真係要重新定義！
記者：梁美甜
攝影：譚盈傑
鍾意車呢份心情係無年齡之分，幾十歲到兩三歲都可以擁有。日本絕版車會趁兩歲生日，搞絕版日本車嘉年華會，一呼百應，成百部日本車列陣，由停產陳年車到近年限量車款都有。有趣嘅係場中唔少Family，揸相機嘅唔係大人而係細路，問小朋友場中至愛車，竟答得有板有眼：「爹哋至愛同佢一樣大CelicaGT、AE86，因為電影夠紅多人識、NissanPAO外形可愛大過你同我（你叻！）、四驅車好Man好型（你知咩係Man？）……」
1972
ToyotaCelicaGT
話明係GT，擺明車馬係跑車性能，車尾造型誇張，我最鍾意係70sFeel嘅古典側鏡同車身懷舊標誌。
1975
三菱GTO
70年首次量產，誇張設計，大大個鬼面罩同獨特四圓頭燈，可以話係當年日本引起「飆」車風嘅元凶。
1995
DaihatsuHijet
六座細車，659cc引擎力量有限，但齋賣樣已經殺晒！
最有味道70's
最矚目莫過於置於七十年代區域嘅多部老車，部部都有本事令現場熟男花過十分鐘時間欣賞，尤其係幾部Celica。「大斜車尾好有淑女同911影子喎！」我都要慢慢欣賞。身旁幾個忙於影相嘅熟男即時搭訕：「當年勁過911啦！直頭係兩公升跑車仔嘅班霸！」係！話晒71年推出第一代Celica只係一部雙門跑車，74年就換上三門揭背GT跑車造型，直到75年換上2公升引擎之後，旋即升格成熱門小跑車！
同置於70s場地嘅另一部搶鏡老跑，係三菱超級經典跑車——75年GTO。70年推出嘅MR版GTO，極速達200km/h，係當年日本同級最高速車種。然後又俾部改成大輪胎超新淨嘅豐田LandCruiser吸引住，望一望行車證，「嘩！82年車嚟！」部車Keep到勁新淨，完全睇唔出佢成27歲，「我家都用緊！」輪胎咁大咪好大咬？「$2/km啦！」車主陳生似乎有啲怕醜，反而佢囝囝Ziv就邊聽邊點頭好認同咁款，於是問佢全場至鍾意車仔，佢毫不思索，「AE86，豆腐車最型仔！」服！
齊齊Show
當日除咗日本絕版車會會員外，各路絕版日本車都齊齊到場賀壽，百車並駕齊驅，都咪話唔墟冚！
鳴謝：日本絕版車會（31265169）
