10年前容祖兒憑《未知》唱紅懷春少女一顆懵懂的心，經歷過自戕式的《痛愛》，睿智式的《愛一個上一課》，到現在開了竅的《可歌可泣》，情歌世界豐富如萬花筒，偏偏現實中卻交白卷，只得「隱形男友」陳方藤和同性密友何韻詩。穩坐最受歡迎女歌手寶座，高處不勝寒，冷了總想有個人為自己加衣，28歲的祖兒宣佈，往後10年，她會努力找尋另一半。 撰文：何慧斯
屈指一算，今年是英皇一姐容祖兒入行10年的大日子，回顧這10年的轉變，祖兒日前笑說：「喺呢10年我覺得性格上冇乜點改變，但係個人就煩咗好多，尤其喺工作上緊張程度比以前大咗好多，我以前係唔會為工作而失眠，但係家就會，可能我知大家都對我有期望，我又唔想交啲行嘢出嚟，好似明知有啲嘢可以唔使太認真，但係我點都要過自己嗰關。
諗頭多多添壓力
「我都知道歌手嘅本份係唱好啲歌，不過我又想接觸多啲工作嘅嘢，所以呢一、兩年係多咗同公司開會，講過好多自己嘅諗法，最初佢哋係冇乜信心，好多懷疑，跟住我又會用好多方法去說服佢哋，喺個過程入面要付出好多努力去爭取，雖然過程係好辛苦，唔單止每日工作上要提起精神，又要面對觀眾同傳媒，可能因為咁，我會更加珍惜屋企，只有呢個地方可以令我放低所有煩惱。」
踏入下一個10年，祖兒在工作上會有新轉變，她笑說：「我最大挑戰對手係自己，所以我會將自己眼光放遠啲，睇吓自己可以挑戰得幾遠。」而一向交白卷的感情，祖兒又笑說：「呢啲冇得強求，我反而喺呢10年清楚知道，我係需要有啲乜嘢人喺我身邊，因為以前會着重佢好唔好笑，又係咪我心目中嘅條件，但係我發覺兩個人嘅相處，第一個感覺係令大家都迷失，不過相處落之後，你會發覺可唔可以相處同體諒都好重要，呢一、兩年我打開咗自己嘅心扉，唔抗拒去識啲真心對我嘅朋友，喺往後嘅10年，我會努力搵個啱我條件嘅人。」
着重與觀眾互動
祖兒今年為入行10年將會舉行連串活動慶祝，頭炮將在下月13日於香港兆基創意書院演出「容祖兒MoovLive音樂會」，在這個音樂會上，祖兒表示有新嘗試，她說：「我同Moov今次係第一次合作，雖然今次個場地比較細，只係容納到400幾人，不過我都好興奮，一來喺音樂會度我會唱晒新碟嘅國語歌，二來又好少喺呢啲特別場地搞音樂會，我諗到時嘅形式會好開心，同觀眾嘅距離拉近，互動自然會多啲，可能一嚟就唱，唔使warmup。」
祖兒續說：「我之前都有問過唱晒國語歌有冇問題，不過佢哋話冇問題，仲話嚟得睇嘅人都係對我有興趣，叫我唔使咁擔心，所以今次係一個大嘗試，仲係一個好機會了解新歌背後嘅故事，觀眾聽得會更加投入。」
迷失自我的日子
每年娛樂圈都有不少新人湧現，同行間的競爭又激烈，要站穩一席位實在不是容易事，未知是否人紅是非多，又或者被勝利冲昏頭腦，所以很多時每位當紅的藝人總被是非纏身，對此，祖兒慶幸自覺能力好高，她說：「由入行到家，我一直都覺得藝人都係人，成功係有好多嘢要多方面配合，並唔係一個人可以得到晒所有嘢，要得到成功，反而要多謝身邊嘅人幫你，我好幸運身邊有真心幫我嘅人。」
祖兒續說：「我仲覺得娛樂圈係一陣煙，一個幻象，就算人哋讚你同覺得你好，你應該係做多啲嘢鞏固自己，我見過一啲人成功有改變，所以我更加覺得呢啲人係一面鏡，用嚟警惕自己，千祈唔好咁做，做人要有自覺，同埋識得去感恩。
學懂調整心情
「我都試過迷失自己，不過當時只係我唔識得欣賞自己，成日覺得點解做得咁差，就算好似得到一啲嘢，都想做得更好，唔想令觀眾失望，最後咪變咗畀自己好大壓力，好似明明對腳係唔夠長，但後面有一道力係咁推我行，所以咪行到一仆一碌，我好少同大家分享，我覺得做得呢行係有壓力，所以會自己調整心情。」
攝影：陳志嵐
化妝：ArrisLaw
髮型：HeibiceMokofhc
服裝提供：HarveyNichols