雖然近日細價股成為散戶熱炒對象，不過個別大價股仍然有好多人關心，事關呢類大價股以前風光之時，令不少散戶既羨且妒，因為當時股價高，買貨成本唔輕，所以唔少散戶只可眼白白睇住隻股流口水，個心成日諗住他朝股價大跌時就買番些少。
不過，股價若然由高位跌到出界，背後一定有原因，事關股價表現已經透露公司有隱患，而當一隻股票質地變咗之後，低位係咪代表「抵買」，就見仁見智。
好似思捷環球（330）曾係散戶心中「明星股」，其股價最高升至130元水平，但在07年隨大市升上32000點水平後齊齊見頂，之後公司業務因受歐美市場打擊甚大，去年股價幾乎跌足一年，近期雖見回升一浸，不過家陣仍然50元唔夠。
思捷剛公佈首三季業務狀況，雖然無驚喜，但坊間券商普遍唔感到意外。不過，公司管理層仍對業務保持樂觀，爭取下半年同店銷售增長保持上半年的6.3％，以及有信心全年新開分店110間。截至今年3月底止，集團共有782間零售店。
此時此處此模樣，假如思捷業務係集中內地的話，股價肯定兩個樣。可惜，歐美市場復蘇之路仍長，散戶想買思捷以慰當年唔敢買之情意結，都係等40元左右先好諗。
方星俠