呢期《海嘯救生圈》嘅手風唔係咁順，既然係咁，一於拗吓氣，揀兩支聯賽榜首隊禾夫斯堡同埋美國芝華士都喺周六嘅賽事失分，只能和波，再串瑞超艾夫斯堡開「大」，作混合過關3串4先。
點解揀德甲嘅漢諾威可以打和榜首嘅禾夫斯堡？好簡單，皆因唔覺禾夫斯堡有冠軍相，而且呢隊波作客表現麻麻，漢諾威今季主場又勁，喺聯賽淨係輸過一場咁大把；加上攻擊球員好似布真克同埋巴列殊等又「弗」，一於冷敲和波，有3.9倍。至於美國芝華士目前喺美職聯可以居首，更加係異數，因為呢支加州球隊傷兵一籮籮；不過，佢哋喺周六迎戰韌力十足嘅華盛頓聯隊時，相信係失分嘅時間，芝華士唔單止有中場主力基捷斯坦停賽，而華盛頓話晒都係東岸「1哥」，和波合理。
艾軍遇「咸史」多「大」
另外，瑞超嘅艾夫斯堡同埋咸史達斯近況同樣好「弗」，而且入球停不了，加上艾夫斯堡近5次迎戰咸史達斯有4次開「大」，今役亦相信會再開「大」。
另外，日聯川崎前鋒主場特醒，不過球隊今季不時因為開賽初段唔集中而先落後，今迎有一定攻加嘅磐田山葉，一於博前鋒開[客/主]。芝加哥火燄係今季美職聯「和波王」之一，周六訪FC多倫多時，後者今季雖然大變身，表現好轉好多，但相信仍然係打和機會大，總入球吼[2球]及[4球]。
文：吾中