第20屆台灣金曲獎嘅流行音樂作品演唱類入圍名單噚日公佈，蔡依林（Jolin）、伍思凱同黃立行噚日一齊喺台灣出席公佈記者會。周杰倫榮獲7項個人提名，係眾歌手之冠。當中周杰倫會同王力宏、蕭煌奇以及香港嘅陳奕迅（Eason）、方大同一齊角逐最佳國語男歌手獎。
至於入圍最佳國語女歌手嘅包括蔡琴、梁靜茹、蔡健雅、A-Lin同陳珊妮。舊年嘅最佳國語男女歌手獎分別由曹格同蔡健雅奪得，唔知蔡健雅今次會唔會冧莊呢？
方大同入圍感驚喜
獲得最多個人提名嘅周杰倫就憑《魔杰座》角逐最佳國語專輯獎、最佳專輯製作人獎、最佳國語男歌手、憑《稻香》入圍最佳年度歌曲獎、最佳作曲人獎、最佳作詞人獎以及憑《魔術先生》競逐最佳音樂錄影帶獎。周杰倫噚日話：「我特別開心《稻香》入圍最佳作詞、作曲、年度歌曲，有激勵人心的正面意義。」周杰倫嘅前緋聞女友Jolin覺得周杰倫贏面好大。被問到介唔介意同周杰倫或昔日情敵侯佩岑同台？Jolin笑笑口話：「可以啊，我一直都很隨和。」
身為第14屆金曲歌王嘅Eason今年入圍最佳國語男歌手同最佳國語專輯兩獎，噚日佢就話：「又嚟啦，真係好開心，好多謝評審對我嘅肯定，同埋一班工作人員嘅努力。」王力宏則話以平常心看待今次頒獎禮。
至於連續兩年有份競逐最佳國語男歌手嘅方大同噚日接受電話訪問，佢話得到提名已經好開心，但就冇諗過自己會唔會得到男歌手獎，佢認為入選歌手都有機會得獎，仲話到時會出席頒獎禮，睇吓有冇驚喜。台灣金曲獎頒獎典禮會喺下月27日喺台北小巨蛋舉行。
