六四20周年前夕,中共已故總書記趙紫陽政治遺言突然曝光,成為國際新聞。香港人心懷六四,當然十分關注呢件大事,不過聲稱「事事關心」嘅無綫新聞,前日(5月14日)六點半新聞竟然冇呢單新聞。不過,唔講並不等於不存在,好多心水清觀眾對TVB隻字不提趙紫陽遺言心中有數,網民反應激烈,狂插TVB。
由於連被譽為「中央十台」嘅亞視新聞都有報道趙紫陽遺言,TVB咁識做,網民建議TVB應該正名「CCTVB」,亦有網民在無綫討論區留言:「TVB新聞部已經被河蟹(和諧)了!」八方收到料,唔報呢單新聞係由新聞部話事人袁志偉「花哥」親自下令,後來11點晚間新聞先有一小段報道,估計係因為連「中央十台」都有將趙紫陽遺言錄音出街,無綫新聞隻字不提相當不該,惟有點綴式講幾句。
花哥六四後獨家訪問李鵬,同李鵬親切握手鏡頭至今仍然為人津津樂道,和諧唔係今時今日嘅事,20年前已經被河蟹咗啦。