袁詠儀（靚靚）、蒙嘉慧和陳敏之前晚擔任《美女廚房》嘉賓，三人廚藝麻麻，表現雞手鴨腳，即時被現場打扮得青春逼人的美少女廚神和天使搶盡風頭。當主持人喝令眾天使陪評判黃秋生時，靚靚即說：「男明星成日用惡勢力搞啲女藝人。」
袁詠儀、蒙嘉慧和陳敏之前晚在將軍澳電視廣播城錄影《美女廚房》，兩位影帝級人馬黃秋生和張家輝擔任評判，雖然三位美女落力炮製美食，但明顯廚藝麻麻，更雞手鴨腳烏龍百出，不時要搵幫手請槍煮食。現場的天使也看不過眼，自動走到她們身邊幫手，即時被主持人喝令天使要過去陪評判，靚靚即不屑說：「你睇啲男明星成日用惡勢力搞啲女藝人。」秋生反擊說：「個個都搞，就係唔搞你。」
被張家輝嫌老
由於現場的天使和美少女廚神皆青春逼人，令到三位美女廚神都即時給比下去，當靚靚得知天使可以陪評判時，一向恃靚行兇的她嚷着也要上評判台，張家輝即說：「呢度係17歲至20歲先可以上嚟。」靚靚即指他們歧視，及後靚靚又以美言來冧秋生，並大讚他好靚仔，認真惡頂，難怪不受誘惑的秋生說：「你家講埋啲嘢做乜，仔都同人生埋，你有料冇用，咁牙擦。」
美少女廚神Connie穿上低胸上衣出現，不時刻意俯身餵各評判試食她的食物，似乎有意利用美色來爭取高分，但一臉嚴肅的秋生不為所動，更拒絕她和短裙天使Emily餵食，他目不斜視兼義正詞嚴說：「除咗我阿媽同老婆外，都未試過俾其他女人餵。」
事後張家輝笑言面對打扮性感的美少女廚神好「濕碎」，因為電視尺度有限，而且玩遊戲也不會令人起歪念。至於自言零下廚的靚靚笑指是來搗亂，她自爆以前初拍拖時，曾試過下廚冧老公張智霖，但最後煮了一天都未能成功。
嘉慧否認爛賭
此外，早前蒙嘉慧被拍到在聯誼會附近泊車，即被指爛賭打牌，她沒好氣說：「如果有多啲招牌，咁咪話我嫖賭飲吹，泊喺街都會出事，好似係鄭生（指男友鄭伊健）身旁影到個女仔都會話係我咁。」
採訪：王崇穎
攝影：陳順禎