謝天華同苗僑偉（三哥）喺無綫新劇《老公萬歲》中古靈精怪，形象百變，繼戴上爆炸頭假髮扮小學生嚇人一驚後，噚日佢哋又同張可頤、李綺虹喺石門拍外景，齊以黑超特警look出現，不過負責嘅任務竟然係運送謝天華嘅精子。
可頤綺虹齊大肚
噚日攝製隊喺現場先後拍咗兩組戲，張可頤同李綺虹分別裝假狗扮大肚婆，謝天華仲手多多，搭住李綺虹膊頭撫摸佢嘅假肚，拍完後四人轉裝再拍。由於之前不時有傳媒影到男女藝員同車換衫，佢哋為免俾人講都係輪流上車換戲服，各自戴墨鏡、着全黑老西上陣，謝天華拎住一個銀色篋，原來劇情講述篋中藏有佢嘅精子，三哥、張可頤同李綺虹負責護送，點知途中撞正差人搜篋，鬧出連場笑話。
其間四位藝員坐喺車廂等埋位時，各自飲汽水同食雪糕消暑。到正式roll機，三哥先要大叫一聲「呢個蝌蚪行動已經開始」，但佢一講完已經笑到踎喺地下，其他三人隨即爆笑，在場fans見狀同樣忍唔住笑。
三哥義務做拍友
其實噚日斷斷續續都有唔少fans搵幾位藝員影相簽名，尤其見到三哥同謝天華時，都會大叫佢哋喺《學警狙擊》中嘅角色名「孝哥」同「Laughing哥」，佢哋見fans咁熱情亦有求必應，就連協助拍攝嘅交通警員都自備儍瓜機同藝員合照，三哥仲做埋影相佬，認真唔話得。
