去銀行時咁啱人有三急點算好？銀行內部有職員洗手間，係咪可以方便吓「危急」嘅顧客？
上海市民朱女士突然有需要，想向銀行借個方便，點知職員叫佢去隔籬賓館借，但朱女士幾分鐘都忍唔到，搞到失禁超尷尬，仲引起當地傳媒探討顧客可唔可以借用銀行廁所。
早排上海《新聞晚報》記者走訪外灘、徐家滙同人民廣場等高人流嘅銀行，扮顧客借廁所，發現幾乎全部都唔借，職員叫客人「到外面搵」。
銀行業人士話，唔借廁所係因保安問題，因為銀行裏面有好多現金，唔方便畀外人進入，仲話唔只上海，全國都係咁。至於香港嘅銀行又點？華華問過啲同事，大家都話預咗冇得借。