第二支管治隊伍又建一功！律師鄺家賢想去馬參加灣仔區議會鵝頸選區補選，卻遭西環㩒住，佢問八方，《基本法》同選舉法例都寫明香港人有參選權，如果有人公然違法如何是好。咁簡單，唔使問啦，細路仔都識嗌唔好，八方支持鄺律師去報警，不過佢似乎有好大苦衷，噚日表態唔參選，原因「總之盡在不言中啦」。
有人歸故里，「地鐵救火英雄」季詩傑趕科場，噚日報名代表社民連參選。民建聯鍾嘉敏上星期已交表，提名期星期一結束，6月21號投票。鍾嘉敏在區內打躉多年，屢敗屢戰；季詩傑做過灣仔助理民政專員。地區人士話牌面民記睇高一線，但如果讓200票，社民連博得過。