相傳，每個武林高手都有罩門，weakestlink不能輕易暴露人前，否則俾人點中死穴就死得……特首曾蔭權，最弱智嘅一環，相信係歷史科。煲呔讀書時歷史科唔及格，大個咗依然肥佬，兩年前亂噏極端民主會變成文革當眾出醜，要道歉甩身，噚日喺立法會答問大會講到六四事件時再次狗噏，聲稱自己代表香港人，唔講平反六四，觸發議員集體反枱，咁墟冚嘅離場抗議場面，史無前例，十分壯觀。
終極Laughing哥現身
煲呔再次失言「死因」暫時不明，政壇中人無不晒頭，民主派批評佢扮失憶，以為只要搵到錢，香港人就唔記得要求平反六四，呢種想法肯定唔可以代表香港人啦；有個親北京議員嘀咕煲呔今鋪究竟搞邊科，私下向民主派議員套料，質疑煲呔以另類方法呼籲更多市民參加六四燭光集會，「係咪幫你哋谷人頭呀！？」
港大學生會前會長陳一諤淡化屠城血案、醜化學運領袖，已經有人思疑佢係「無間道」，捨身成仁幫六四20周年熱身，連華叔都笑晒講多謝，估唔到原來煲呔先係終極Laughing哥！如果因此有30萬人去燭光集會，人人喊打要佢落台，八方恐怕「黃雀行動」又要operation，護送煲呔着草。
大家唔好以為煲呔狗噏，泛民食住上最着數，佢哋話中聯辦先至最happy，分分鐘已經買定花生㖭，事關有個咁英明嘅特首，更加證明香港需要「第二支管治隊伍」。比較愁嘅係煲呔好兄弟鬍鬚曾，因為佢炮製中嘅加碼預算案根本冇預計到呢個「狗噏政治炸彈」，前高官羅范當年評論教師自殺言論凉薄，政府要掟16億元補鑊，今次如何為煲呔撲火，條數認真襟計。
高官冇癮 邱騰華走先
政府總動員「戰勝」豬流感，眠乾睡濕先至令高官民望反彈，煲呔卻累街坊，可以想像其他司局長幾咁冇癮。噚日泛民離場後復會，一眾官員木無表情，環境局局長邱騰華更加中途走人，應該唔係玩離場，只係冇眼睇啫。話說回來，煲呔係小圈子特首，真係不該代表我哋，如果佢真係知道市民心意，講多無謂，六四維園見。
mailto:[email protected]