從政揸掃把有前途，民建聯即時成立「千人抗疫大軍」，由副主席葉國謙同北區區議員劉國勳揸旗，揭視全港街頭巷尾60幾個衞生黑點，佢哋指中西區及油尖旺區邋遢，已要求食環署做嘢。
同高官落區洗地一樣，民建聯今次都係做騷，因為舉報衞生黑點只係表面工夫，唔針對垃圾源頭，即係罔顧清潔嘅食肆，掃幾多次街都冇用；只是食肆老闆、員工都係選民，如果要求政府加強檢控打擊違規食肆，無異倒自己米，因此不提為妙。
噚日出席記者會嘅劉國勳係新上任嘅副政策發言人，係黨內明日之星，隨時係「陳克勤第二」，有記者要求佢以英文接受訪問，佢話冇準備，扭擰後由女助手傍住開腔。八方見女助手好識做，不斷遞上寫有英文答案嘅紙仔提水。
black讀成bad
訪問時劉國勳偶然將hygieneblackspots讀成badspots，又要求當局將衞生黑點updateoneweekonetime，八方估計佢應該係想講weekly，由於詞不達意，搞到記者一頭霧水。陳克勤身為師兄，應該幫吓兄弟手啦。