同一個天水圍，在許鞍華的調校下，日與夜變成只有夜和霧，每天都是惶惶然。華仔在新片《天水圍的夜與霧》扮演倫常慘劇兇手李森，手刃妻子張靜初和兩女兒。華仔自言曾因無法抽離，致經常失眠，結果要求醫。
電影《天水圍的夜與霧》改編自04年天水圍一宗倫常慘劇，預告片經常出現一個畫面：任達華騎着單車，載着兩個女兒愉快地沿着河邊上學去，快樂背後原來暗藏殺機。華仔在開拍前用了三星期融合天水圍，日日在公園坐搵人傾、搵人睇，凌晨3點與年輕人在7仔門口隊啤酒減壓。
華仔說：「班攞綜援嘅男人，四五十歲，日日釣魚，浪費緊自己嘅時間，佢哋話出去做嘢都冇用，因為車費好貴，人工唔高，唔夠攞綜援咁舒服。」
投入角色自困
華仔又打個比喻：「一個好靚嘅雀籠，入面擺咗好多靚雀仔，政府將佢擺喺一個好靚嘅地方—天水圍，側邊冇嘢食，如果要飛兩個鐘搵嘢食，返到去又好攰，唔及有人餵咁好。結果就困喺雀籠裏面，睇唔到出面個世界，越嚟越多爭執。」天水圍困住無數人的心靈，李森此角色也困住華仔的靈魂，最後那場戲，講他殺死妻女後自戕，令他失眠了三日，要向醫生求助：「因為投入咗個角色，先有壓力，有幾場戲我未搵到，越搵越深越搵越痛苦，瞓唔到。好似話一個大男人喺個社工面前，跪低喊晒求個女人返嚟。我同阿Ann（導演許鞍華）講，我搵唔到，可唔可以唔拍住？佢畀我跳拍幾場輕鬆啲嘅，卒之又係瞓唔到。」
「打到佢損晒」
首次與內地女星張靜初合作，她飾演其妻，受盡折磨，華仔大讚她夠勤力交足戲外，還要向她道歉：「因為係真打佢，佢要求嘅，真係要同佢講聲對唔住，佢真係忍受到我咁樣打佢，打到佢損晒，又扯佢頭髮，綁到瘀晒，有時仲係suddenhit，雖然綵排過，不過我梗留啲嘢，正式先做，嗰個反應先係最真呀！」
採訪：吳佩思
攝影：林德雄