大家一遇到搬傢俬、車大狗、包車玩嘅時候，第一時間都應該會諗起電召客貨車服務。但有無諗過，部車可以金光閃閃豪成咁？如果話你知呢架貨Van都係三十蚊就有得Call，信唔信？
記者：許維雅
攝影：伍慶泉
Model：Kinki@Puremodels
鳴謝：勁達客貨車電召（21103333）
對於好多人嚟講，早十年八年Call客貨Van都好容易會遇到唔愉快嘅經歷，次次海鮮價、完事後先同你講價仲要左加右加、司機大佬態度又差等等。但今時今日嘅Call車公司大大話話都有幾十間，競爭咁大，要搶啖飯落肚，好多都明碼實價兼經濟。司機大佬少有呼喝之餘，仲要識得整色整水幫搵食車裝身引客仔。好似Dick哥仔前前後後就用咗六、七萬蚊整到架車變成金色豪Van，DIY金色梳化椅、金色咕、地毯及裝飾小擺設等，一開車門見到嗰一刻實在令人嘩然。Dick：「係呀，好多街客Call車時都唔知，見到我架車開門嗰下都會嘩嘩聲。」
客人開心自己醒
原來落本豪裝為客仔之餘都為自己，在場各司機異口同聲：「我哋24小時開工，日日坐喺車入面，架車靚仔啲，自己舒服啲，開工心情都好啲啦。」不過改車從來都係燒銀紙玩意，個個都話用咗幾萬蚊裝飾架車，咁咪搵埋都唔夠整？定係做客貨車司機真係咁好搵？經營電召貨車公司十年嘅老闆Dee哥開估：「搵唔搵得多就有好多因素，睇你本身客路、勤唔勤力、上嘅台好唔好。好多司機想入線都唔係咁易，細台無生意，大台又要有熟人介紹。好似我收司機都有三大原則：第一，要自己公司司機介紹，物以類聚，個司機質素好唔好都有得估；第二，司機一定要協助客人上落貨；第三，架車前後座都要有冷氣。服務好就生意好，司機搵到食先有錢整靚部車。」
車主：Dick
改裝費：6-7萬
用一日時間親手製造金色梳化椅及夾棉天花，擺埋地毯、香薰及迷你電視等。車頭仲放滿用《怪誕城之夜》阿Jack公仔作主題嘅小飾物。
高貴閃石黑Look
車主：阿安
改裝費：6-7萬
軟綿綿黑梳化仲配襯埋閃石，加埋毛毛黑咕、格仔地毯，夠晒型格。
全紫色爆機車
車主：阿龍
改裝費：2-3萬
全紫色車身配襯埋紫色內櫳，加埋兩部擴音機喺車尾，啱愛爆機客仔。
Call車小貼士：
①一般設最低消費
好多公司現在都會明碼實價列明收費，大部份都分區計價，當然同區收費最低，另外，貨物大小、隧道費等額外收費都會清楚列出，大大減低拗數機會。
②要求要講清
有任何要求要喺落Order之前講清楚。例如接寵物、要求乾淨新車等都無問題，一般不另收費，但當然要先問清楚啦。但指明要邊一架車就做唔到，撞到豪裝Van就真係要講彩數。
③港島區多靚車
司機裝修得架車咁靚，都唔想俾啲泥水、垃圾、裝修物料整爛整污糟，所以Dee哥話啲主題靚車通常都會喺港島區等客，至於旺角至深水埗一帶，就幾難Call正佢哋。
④經公司有保障
雖然司機可以自行接Order，但若要求代交收貨物、先支付尾數接貨等額外服務，經公司會更有保障，不過當然要額外收費。