甲型流感透過飛機，散播全世界，坐飛機係唔係好容易中招呢？咁又未必，據專家講，飛機上嘅空氣流通好快，一小時之內，新鮮空氣替換機艙的空氣，可以多達二十次，不比在酒樓內，空氣在一小時內大約更新兩次啫。正因為係咁，來港墨西哥人雖然患上甲型流感，但坐在佢前後幾排嘅乘客都冇受到傳染。之不過，飛機有頭等、商務與經濟艙之別，坐在邊個艙最有安全感？專家對左丁山講：「呢樣嘢就各安天命嘞，單講機率，經濟艙因為人多，最易中招，頭等艙自金融海嘯後，經常空無一人，你有錢嘅，不如坐頭等艙啦！」講笑咩，來往紐約嘅頭等艙機票要十幾萬銀一張嘅噃。講機率冇話唔啱，商務艙與頭等艙內，乘客可以保持一啲距離，唔似得我哋在經濟艙擠逼如沙甸魚，座位隔籬乘客嘅呼吸聲都可以傳入自己耳朵。但機率甚為機械化，如果冇運，坐頭等艙碰正A1座位嗰位仁兄或仁姐啱啱去完墨西哥，你可能震到瞓唔着㖭。
人力資源經理I同左丁山講，佢公司最近對公司幹員出差，為防住在酒店受隔離，訂下幾樣增加麻煩嘅政策，例如三人出差要分三班飛機，到咗上海、要住在三間酒店，開會文件要分開三份，以防灣仔維景酒店事件重演。如此一來，公司使費增加，同事覺得唔方便，但又覺得無可奈何。經理I嘅同行在某大機構服務，該機構下令所有職員出外旅行，無論公事私事，必須得到批准備案，自外地回來，要在家自我隔離三天先至准返工。於是就有人攞假三天出外，自星期三到星期五，加周末兩日，星期日深夜回港，在外玩夠足足五日之後，星期一、二、三在屋企瞓覺休息三天，星期四返工，人力資源部知道有人攞便宜，唯有隻眼開隻眼閉。
自沙士之後，所有大公司都做定應變計劃（contingencyplan），呢日碰到大編輯/社長，左丁山問佢：「假如你哋有人不幸染上豬流感，要封鎖隔離編輯部，你哋點樣出報紙？」大編輯話：「我哋有開會傾過呢個可能性，十分頭痛，仲未有定案！」