二戰後，蘇聯突然發覺自己最大敵人嘅源頭，已從歐洲變成花旗國。角力場地由自己周邊地方，一下子擴大至全世界。蘇聯領導知道要喺世界呢個舞台贏，就要得海洋控制權，或起碼唔畀花旗國玩晒。所以決定可以射導彈嘅潛艇，係保國唯一出路。
因地理問題，唔好話潛艇隊，蘇聯當時連海軍都冇乜，根本冇「行內人」去設計新潛艇。咁點呢？蘇聯搵咗設計米格戰鬥機班「外行人」去設計潛艇。
當時無論咩國嘅潛艇設計，都係抄第一次世界大戰德軍UBoat潛艇。不過蘇聯班設計師冇包袱，重新諗點做，炮製出順水好多嘅「淚珠形管道」設計，外行人改變咗潛艇嘅形狀，令蘇聯潛艇被各國尊重。
如果歷史改寫又點？假設蘇聯總書記都好信「潛艇係唯一出路」論，亦肯傾國傾城去做，落order要喺某時限內見到隊潛艇每日發射40枚導彈。
外行領導盞撞板
不過總書記唔熟水性，連水都唔游（話唔啱自己feel），但就對潛艇設計過程非常handson。有次開會仲話：「我唔要啲潛艇密封。」班設計師諗：「會漏水死人，唔掂㗎。」但只得一個敢話：「其他國家潛艇都係密封喎。」個設計師被即時派去西伯利亞，之後冇人敢講：「唔掂㗎。」
最後，有個盡忠嘅軍官接手，成功製造日射40枚導彈嘅冇密封潛艇隊。不過潛艇落水冇耐，總書記問軍官：「點解我哋啲潛艇冇潛過？又未出過港口。點解敵人仲喺度？啲導彈冇摧毀佢哋咩？」軍官諗：「你話要射，冇話要中。」但開口答：「總書記，我哋finetune緊㗎嘞……」
孫柏文
http://phatdat.blogspot.com