拜仁慕尼黑復活在望啦！佢哋周三宣佈荷蘭名帥雲高爾將執掌球隊兩年，呢位前阿積士、巴塞教練曾經揚威歐洲，可惜之後被迫潛水多年，今次仲唔借拜仁一鋪翻身，再次指點江山？
雲高爾教波有幾威呀？佢91年執教阿積士就贏歐協盃，95年擊敗AC米蘭攞歐冠盃，96年歐冠盃決賽射12碼慘負祖記，當時從皇馬到AC、祖記，見到佢嘅手下古華特、迪保亞兄弟腳都軟埋㗎！咩名教頭卡比路、費格遜、納比，通通都行埋一邊。
摩連奴都係學佢
97年，雲高爾同班阿積士弟子轉投巴塞，連攞兩季西甲冠軍。目前喺歐洲打橫行嘅摩連奴，當時只不過係雲高爾身邊嘅阿四，後來呢位葡萄牙教練承認喺對方身上學到好多嘢！可惜，雲高爾性格自我、講嘢稱呼人少，於是得罪傳媒同球員要辭職。
人生有起有跌，雲高爾之後執教荷蘭國家隊、重返巴塞，以及擔任阿積士技術總監都不得志，逐漸淡出球壇大屏幕。05年，雲高爾從低做起執教阿爾克馬爾（AZ），喺06/07球季雖然得荷甲季軍，但上季成績勁差，搞到佢自己覺得好冇面想辭職，喺班球員力挽下先至留低，終於今季奪得荷甲冠軍，一鋪翻生！
拜仁說服AZ放人
「我係最勁嘅！」57歲嘅雲高爾捧起荷甲冠軍不忘一吐多年烏氣！果然有麝自然香，拜仁高層路明尼加、漢尼斯親赴荷蘭講數，終說服AZ放人，拜仁將同對手打場熱身賽補數。漢尼斯以「足球老師」形容雲高爾，路明尼加就讚佢「履歷過人」。
雲高爾今次帶埋威廉二世技術總監、前巴塞助教鍾加（Jonker）過檔，對方老婆都辭埋職移居德國，可見兩公婆同拜仁一樣，對雲高爾有99.9%嘅信心。睇嚟我求大俠都要燙翻直件拜仁舊波衫，重新加入拜仁球迷行列先。