有觀眾打電話問股票，聲稱揸住股票A，係因為聽見人哋話好就買，眼見有波幅無升幅，一直想沽咗佢，但係次次想走又冇走到。呢種情況喺好多小股民身上出現過。
睇唔通大市，對個股本身質素冇研究，個心都唔喺隻股票度，淨係想買嚟搵着數，講多兩句公司背景及最新情況都唔想聽落去，只係想知道返唔返到家鄉同埋幾時落車。
其實好多事情唔係表面咁簡單，淨係記住以前個價係冇用嘅，大戶出貨往往越沽越高（記否有隻股份，大股東多年來一路沽一路升），你見過100蚊嘅股價，就會覺得50蚊好便宜，當年華晨（1114）一樣由5蚊俾人掟到落兩個半，跟住大把人覺得抵買追入，到今時今日都未返家鄉。
聽電台睇報紙淨係留意冧把，明明自己有對眼，係要扮盲，唔肯帶眼識股，隨時預咗要交學費。又話想短炒，又話唔放心，同賭一鋪無分別。當然，瞻前顧後你可能會錯失機會，但從來冇聽過存錢喺銀行蝕息會蝕死，做錯買賣決定輸身家嘅就見過好多。
盲公竹不可盡信
互聯網咁普及，資訊不對稱嘅問題其實已經減少。搵盲公竹無可厚非，但係股份推介嘅背後，有幾多不為人知嘅故事就唔容易睇得清楚。例如有啲大行在公司上市前後自己揸重貨，一條龍服務做埋批發零售，送多一份「產品說明書」等你接貨接得放心，最近就有一隻做風電設備機葉嘅股份，完全同一個劇本。
好多人以為盈利前景財務數據係支持股價嘅基本要素，但以中國鋁業（2600）為例，PE成七千幾倍，預測今年都仲會係幾百倍，PE唔掂，PE/G更唔掂，因為G（Growth）已經變成負數，當估值已被盈利表現扭曲，還有甚麼參考價值？
用公司盈利前景衡量？唔係業內人士或者公司管理層肚裏面條蟲，就真係唔好班門弄斧，就算係大行分析員，都冇見過邊個可以百分百估中上市公司業績。
公司前景咪又係聽信管理層甚至用同業經營表現去估，越來越多分析報告要唱好就揸住幾個優點無限放大，要唱衰就騎住幾個缺點咬住唔放，關鍵在於有冇人（資金）投佢報告一票。
胡孟青