立法會噚日舉行特首答問大會，阿二政務司司長唐唐有責任撐場護主，點知煲呔講錯嘢出事，唐唐亦出師不利。唐唐噚日下晝3點坐佢架CS車牌座駕抵達立法會大樓外昃臣道，立法會一眾保安員見唐唐駕到，即刻圍圈護駕防範示威人士埋身。
豈料車未停定，有個企喺座駕右邊嘅保安員突然轉身，腳掌慘遭右前轆車過，司機即時問保安員有冇受傷，個保安員當時冇乜感覺，隨口話冇事，唐唐不以為意行入立法會。點知個保安員後來覺得被輾過嘅腳掌好痛，要搵在場警員召救護車送院檢查，據講情況不太嚴重，真好彩。政務司司長辦公室發言人稱，司長已親自致電慰問嗰位保安員，祝佢早日康復。