朱咪咪，由酒廊搞笑搞到上《歡樂今宵》再唱到紅館；許冠英，文武英傑四兄弟，由細駁Gag駁到大，以為老土笑話敵不過潮語爛Gag，錯啦，開Show四場未出海報就火速爆滿，就連娛樂版也這樣起題：「賣飛好過陳志雲！」難道真是古老當時興，無人好笑得過朱咪咪加許冠英？
記者：蒙為亮
攝影：梁細權
鳴謝：美都餐廳
朱咪咪
七十年代新加坡及香港粵語小調歌后，曾在香港酒廊及夜總會賣唱，1990年與尹光在紅館開Show，之後二人一起簽約無綫。她曾參演《審死官》、《逃學威龍3之龍過雞年》、《唐伯虎點秋香》、《大內密探零零發》等電影，皆擔任諧角。
許冠英
出身邵氏訓練班，常在電影扮演被欺負角色，曾唱《發錢寒》、《蝦妹共你》、《波士》等電影主題曲，替《無情夜冷風》一歌填詞，2005年在理工大學賽馬會綜藝館舉行《許冠英斤両十足演唱會》，現正籌備《金童玉女響屯門演唱會2009》演唱會。
許冠英=英 朱咪咪=咪 記者=記
想做玉女歌手！
王晶說過，一級的喜劇演員，單看樣子已經令人笑得出，說中了！與許冠英及朱咪咪打個照面，我腦海即時浮現出《猛鬼差館》那被迫與女鬼共赴巫山的老差骨和《唐伯虎點秋香》裏那肥騰騰的朱西，已忍不住笑了。
咪：記者哥哥，你無嘢嘛，使唔使我幫你喊驚呀？（扮問米，反白眼，拍枱拍凳！）
英：我可以幫你問吓喎？
記：問乜？
英：問米囉，我幫你「請」個人好快㗎咋，你有錢畀就得。
記：哈哈！你哋唔好玩我啦，不如……言歸正傳，其實你哋覺得以前嘅笑話同家流行嘅爛Gag有乜分別？
咪：分別大咯，以前啲笑話皮笑肉不笑，要互動要有起承轉合，要引嘅唔係一兩個人笑，係一次過引大班人捧腹大笑。家啲爛Gag硬要唧到人笑，明明唔好笑都要笑，呢啲笑只不過係笑你唔好笑，失敗！
英：呢個世界，無一個笑話可以令全世界人笑唔停，講笑話其實係搞氣氛嘅經驗之談。我最唔欣賞呢兩種搞笑方式，一，挖苦他人短處取得快樂，搞笑唔等於取笑，笑人矮笑人無手無腳最可恥；二，人哋未笑自己先笑，講笑話同做喜劇最高境界係皮笑肉不笑，用自己笑聲引人發笑，高招極有限。
咪：我剛剛來港，喺中式夜總會同酒廊唱歌，觀眾坐得近反應最直接，做得唔好一定俾人柴台。又好衰唔衰喎，當年我唔係好識講廣東話，班駐場樂手又成日同我講黃色笑話同不文嘢，久而久之搞到我都定埋呢個方向搞笑……其實，我嚟香港係想做玉女歌手嘅，唉……不過有啲嘢真係整定。
記：哈哈，玉女歌手？呢個已經係Gag啦。
英：咦？講開又講，我當初都諗住做偶像歌手㗎，點知當年唱片公司人員話：「阿英，你個樣都係唱番《蝦妹共你》啦。」嗰陣後生，年少氣盛，覺得自己一定要做小生，後來唱唱吓搞笑歌，又發現好有成就感，之後每逢出Show，我都會設計多啲笑位，等大家可以聽得開開心心。
咪：我又唔會袋定笑話喎，我鍾意玩即興。我唔係認叻，不過有啲嘢真係得我先做得到，試問有邊個可以喺台上指住個男觀眾鬧：「整咩呀你，死麻甩佬，再整閹咗你呀。」之後全場拍手叫好？呢啲技巧唔係人人做得到。
賣飛好過陳志雲！
賣票成績理想，加場快將爆滿，問會否再加場，他們斷言不會，皆因兩個字──無期！登台走埠，北登神州南下馬拉，接Job接到手軟的朱咪咪笑言：「幾乎返深圳睇牙都無時間呀。」
咪：要澄清一點，之前話我哋賣飛好過陳志雲，其實唔應該咁比，大家做嘅嘢性質唔同，陳志雲做慈善嘢，我哋就擺明為賺錢，兩個Show都係同一個老闆高志森，咁樣寫出嚟都係噱頭嘢啫，所以大家唔使一提再提。我家接Job接到化晒，工作只為開心，唔為開心，點解要做呢？我都算托賴，今年都有能力叫加價。
記：加幾多呢？
咪：四至五成啦，錢係其次，最開心係有觀眾同歌迷支持，今次《金童玉女響屯門演唱會2009》一個星期唔夠已經賣晒飛，真係好開心。
英：我啲歌迷仲打電話畀我，問我邊度係城市電腦售票網，我話鬼知咩，歌迷惟有入屯門買飛捧場。今次我同咪咪開Show，決定派錢益街坊，喂喂，我講真㗎，唔好笑呀……
記：平時你哋都係咁親民？
咪：我唔會扮大牌，慣咗同觀眾保持朋友關係，家啲藝人太受保護，早前同學友拍《月滿威尼斯》，見到一個細細粒女新人被十幾個工作人員包到實，有乜為啫？我1990年同尹光做過幾場紅館，嗰種感覺我反而唔鍾意，同觀眾隔得好遠。
英：我都有同感，有次阿Sam開演唱會，我做特別嘉賓，佢一路叫：「阿英！阿英！」叫到第十聲先跑到我面前開始合唱，音樂都要Load多幾次。
咪：呢期我都想抽時間睇睇詹瑞文啲DVD，據聞佢玩互動玩到請觀眾上台一齊玩，我都想從中取經，因為我哋個Show其實乜都未度，我諗住上台狂爆肚算數。
英：爆肚一定會，接得好就可以死咬唔放，你有《EYT》式急才，我反而驚我接唔住會Deadair。當晚會有扮嘢環節，我會扮貓王，你會扮梅姐，據聞仲會有性感造型。
記：性感造型？有幾性感先？
咪：……到時你咪知囉，我仲會大唱首本名曲㖭，一啲氣氛歌一定唔少得啦，好似《IQ博士》，全場男女老幼一定識唱，實掂！當然驚喜笑位一定有啦，隨時令大家笑到肚痛，笑到驚，所以請做好心理準備。
五十五十平分秋色
兩人皆是綠葉王，搶戲功力非常到家，今次兩雄相遇，扭盡六壬大放笑彈，究竟誰是主誰是次？誰又奉旨搶戲擔大旗？
英：話明係金童玉女，邊會分主次？當然係五十五十啦，如果唔係另一個咪好着數？唔使做就有錢收！做呢行邊有得計，只有做得好同唔好。
咪：我都係咁話，有時你講有時我講，咁先係最好嘅表演。香港歌手好少爭風呷醋，大家有自知之明又識大體，我成日過台灣登台，見到班台灣歌手乜都爭一餐，爭做Opening爭做壓軸，計我話有乜好爭，做得好，中間出場唱一首歌，已經可以令觀眾留下深刻印象。
英：講到呢度我又要話當年，當年導演最惡，我哋讀訓練班邊有助手，有阿媽煲湯入片場探班已經依嘩鬼叫。最有趣係張徹導演，佢成日鬧人爹娘，惡到會畀五嚿水班場記，班場記收咗錢就要捱鬧唔准駁嘴，我哋叫呢啲做「粗口費」，認真智障！講真，舊時喺演藝圈可以交到真朋友，大家好少爭上位，大家都好友善，好似修哥，好耐無見都仲可以好好感情。
咪：其實呢個Show可以早一個月前舉行，話說我同張達明拍《陳夢吉》，我做佢外母，原先諗住拍10集，每集我都要同其他演員鬧交，嘩，鬧交簡直係我強項，導演話鬧得好，拍拍吓竟然拍咗72集，所以惟有推遲個Show。
英：所以呢個Show大部份時間我哋都會鬧交，我一張稿都無背過，齊打天才波，咁至好笑嘛，好似你啲廣告咁好笑。
咪：講開廣告，有次《左麟右李演唱會》都搵我嚟搞笑，爆我當年拍金威冲凉液廣告，原先全個廣告都係我拍，點知大陸人鍾意鬼妹，搞到我冲完凉之後就變成鬼妹，我睇番都笑。
英：真係笑得咁開心？
咪：總之乜都要開啦！睇得開吃得開就會笑逐顏開！你睇我又唔係靚又無背景，到今時今日都有名有利，咁已經夠好。
英：我就呢一句，只要唔係壞事，我乜都做，最緊要好玩。
後記：咪咪姐很親民，與途人打招呼、拍照、寒暄兩三句永無托手踭。長青常新，賣飛好過陳志雲，總有原因的！難道咪咪姐就是傳說中的「賣飛」佛？Sorry，我知很爛。
《金童玉女響屯門演唱會2009》
日期：6月2日-4日8:00pm
地點：屯門大會堂演奏廳
票價：$100、$160、$220
查詢：27931123
