中國副總理王岐山近日同英國達成共識，話要積極落實加強環球金融監管新秩序之際，對於「監管」呢個字特別敏感嘅美國政府，旋即喺噚日安排美國總統經濟政策顧問委員會成員之一嘅自由市場派人士AllanMeltzer，同中國傳媒講吓加強監管唔係上策。不過佢咁講都幾諷刺，因為美國政府自從金融海嘯後不斷加強監管，唔通佢嘅意見唔係好啱奧巴馬口味？
金融機構唔掂畀佢冧
美國領事館搞呢場環球視像會議都幾罕有，由身處美國嘅Meltzer，同主催加強監管嘅美國30集團（GroupofThirty）行政總裁StuartMackintosh出席討論會，聽眾就係身處中國北京、香港、上海、廣洲，同澳洲嘅記者。Meltzer話，呢場金融海嘯一個重要成因，係因房利美、房貸美等金融機構過份擴張，出事後竟然因規模過大而唔可以畀佢倒閉（toobigtofail），最終導致賺錢時候由公司分享，蝕錢時就由市民承擔，佢認為應該由公司自己承擔。
佢話即使成立超級監管機構，亦唔會走喺危機之先，因銀行界亦識得迴避。總之政府干預冇乜用，等市場自行解決。
不過，同場嘅Mackintosh認為，只係靠銀行業自我監管都唔夠，必須要全球合作，一齊為金融秩序設下新規管，特別係之前未有好好監管嘅範疇，例如引發金融海嘯嘅債務抵押債券（CDO）。呢個話題，講一日都講唔完，如果安排一場中美首腦對話講呢個課題，可能更有睇頭。
李華華
mailto:[email protected]