我們最常吃得到的美食，可能是隱藏在屋企樓下的街坊小店出品，屋邨獨有的冬菇亭就是其一。小記近日收到風，樂富冬菇亭老字號聯合興，清拆一年後剛剛回歸。街坊等到頸都長，終於不用像清拆牛頭角下邨般失望，又可再次吃到油香粒粒蠔仔餅了！
記者：王震遠
攝影：伍慶泉（盈好）、楊錦文（聯合興）
模特兒：Deddy@PureModels
老字號：新舊口味一齊來
聯合興這名字，在樂富區相當有名，街坊提起潮州打冷，定必想起它。聯合興早在75年開業，起初只是路邊檔口，後來搬到冬菇亭，前後做了28個年頭，贏盡街坊口碑，直到08年3月，隨着冬菇亭一同清拆，老闆陳先生無奈將店子移師東頭村。
闊別一年，聯合興今年5月頭再度歸來。不少街坊得悉老店重開，裝修期間已催促早點開業，見證小店獨有的人情味。「啲舊客知道重開，頭幾晚大排長龍，冇位坐要佢哋等都等。」新舖現址匯富坊，原為舊街市。店舖比之前乾淨企理，但座位較少，由50多張枱減至20多張，租金卻反而增加。從前大牌檔經營，不拘小節，現在環境改善，食物賣相也講究了。為應付高昂成本，以前打冷店只做晚市生意，現在早上6時便開舖，賣中式粥品油器，午市主打客飯，晚市除了舊口味如招牌蠔仔餅和滷水鵝、大眼雞等潮式打冷外，還新加入多款小菜，如法式芝士鮮魷、海鮮蝦和孜然棒棒骨等。老街坊重拾舊味道的同時，也有新口味可嘗試。
香煎蠔仔餅$45
單看賣相已知跟外邊的不同，份量真夠大。以半煎炸的方法煎香，餅底厚身但鬆化，滿口油香，咬落粒粒脆口的蠔仔。
黃金海鮮蝦$98
新鮮海蝦加鹹蛋黃和牛油炸香，蝦殼沾滿鹹蛋黃碎，非常惹味，蝦肉咬落爽口有聲，鮮味夠搶。
法式芝士鮮魷$65
半溶狀態的芝士和牛油汁配合鮮魷，口感creamy又香口，麪底棄伊麪改用炸麪，但無油膩感。
孜然棒棒骨$58
用上連骨的豬肉，以香草醃製，滿是孜然香味，蘸點秘製酸辣汁，更能提升肉香。
XO醬小炒王$60
用料十足，以XO醬炒香魚乾、蝦乾、腰果、菜脯等。魚乾和蝦乾經炸過，佐酒一流。
聯合興（23372038）
樂富中心匯富坊4號
生力軍：夥拍龍躉大王
聯合興是樂富老字號，盈好則是生力軍。老闆郭先生在大埔經營醉福樓，這是首度在樂富開店。選擇樂富，原來全因匯富坊的租務經理是醉福樓捧場客，力邀盈好進駐。盈好不是單純的海鮮酒家，另一主打是客家菜，為求味道正宗，郭生還將醉福樓的客家師傅和招牌菜都調過來。這裏日間主力做點心，晚市做小菜。海鮮是強項，酒家跟深水埗有名的恩記龍躉大王合作，提供靚龍躉，日日生劏炮製出多款龍躉菜式。此外，火鍋、鮑參翅肚、煲仔飯、咖喱都有供應。
清蒸大龍躉頭腩$98
大龍躉即劏頭腩部份清蒸10分鐘，肉質滑溜又鮮味。
客家梅菜扣肉$48
師傅將豬肉炸過，再配上秘製客家醬汁，扣肉肥膏在口腔內慢慢溶化，但無油膩感，認真一絕。
客家釀豆腐$58
肉餅以剁碎豬肉加馬友鹹魚煎香，豆腐以蠔油上湯同煲，味道濃郁。
客家鹽焗雞$128/隻
選用2斤半至2斤10両的雞，有油但不肥膩，以秘製藥材上湯浸熟，雞肉細嫩。
盈好（客粵）海鮮酒家（23962668）
樂富橫頭磡東道匯富坊地下A-B舖
