中國上一代人崇洋崇港，但80年代出生嘅一代就有自己立場，未必睇得起港燦。
不過內地評論經濟嘅名人，仍以香港人吃香，據中國評論新聞網報道，香港中文大學講座教授郎咸平喺舊年，上半年出席一個為期兩日嘅論壇，酬金12萬銀（人民幣．下同），下半年喺另一個論壇，只係講半日就袋6萬。今年3月，有記者問佢一條經濟問題，郎咸平拒絕咗，原因係乜唔重要，最緊要係佢話：「你們要知道，我的出場費是上漲的了，目前是15萬元，不過具體銀價也是可以談的。」
報道冇講一場演講幾多粒鐘，但15萬銀講一場，可以話係內地收費最貴嘅經濟名人。據報道，排第二亦係由香港北上發展嘅經濟學家謝國忠，收10萬銀一場。
謝國忠收10萬排第二
牛市時，內地金融機構鍾意請有名氣嘅經濟學家講吓嘢，呢個潮流冇因金融海嘯減退，可能啲散戶失晒方向，需要專家指點迷津，所以搞到專家出場費水漲船高。
北京一間公關公司負責人話，請名嘴出場，佢哋有好多條件，好似要帶助理、交通工具要搭頭等、仲要睇同場嘅經濟學家係咪同級數、自己嘅出場次序。
內地經濟名人演講收費
郎咸平 香港中文大學財務學系講座教授
每場收費：15萬人民幣
謝國忠 著名經濟學家、玫瑰石投資公司顧問
每場收費：10萬人民幣
宋鴻兵 《貨幣戰爭》一書作者
每場收費：10萬人民幣
左安龍 上海電視台財經頻道主持人
每場收費：10萬人民幣
巴曙松 國務院發展研究中心金融研究所副所長
每場收費：3至5萬人民幣
樊綱 經濟體制改革研究基金會秘書長
每場收費：3至5萬人民幣
易憲容 社科院金融研究所金融發展室主任
每場收費：3至5萬人民幣
資料來源：中國評論新聞網
李華華
mailto:[email protected]