20年了，黑白化成色彩，畫筆換了滑鼠，不變的，是他的心。漫畫家尊子的作品以抵死過癮聞名，多年來代巿民吐出烏氣。89民運時，他透過畫筆諷刺共產黨血腥鎮壓，看得人淚中有笑；展望未來，他認為港人要多出力，「共產黨嘅存在係事實，佢改變緊亦係現實……將來變成點，靠我哋努力。」
記者：張嘉雯
於89民運發生時，尊子正在《明報》任職美術編輯，他形容當時整間報館的氣氛都很濃烈，「所有人所有專欄都係講緊呢件事，冇消閒嘅嘢，副刊都好少人談風花雪月，漫畫全部都係畫呢啲嘢。」
「漫畫易分忠奸」
「當時好多人上街示威、抗議，我畫漫畫要過濾一下，要捕捉嗰種感覺，所以要稍為理性，用比喻嘅方法表達出嚟。」他認為，相片的好處是真實，但難加入個人意見；文字有時較累贅，缺乏感染力，「漫畫唔難搵target（對象），鄧小平、李鵬、趙紫陽，好容易分邊個忠定奸，可以用比喻帶出新角度、新觀點，畀人嘅印象深刻。」
不少年輕人未經歷過事件，卻透過他的漫畫認識六四，令他更確定漫畫的功能，「相隔一段長時間之後，漫畫仍可以令讀者有深刻嘅感受，有代入感，但完全通過漫畫去了解一件事係好危險，只能夠作為引子。」
他說當年幾乎天天畫鄧小平，用學生的鮮血來塗脂抹粉、用人民的熱血來浸浴、人民英雄紀念碑下「只」是死了23人，一筆一畫黑白線條，今日看來仍然血淋淋得讓人無法自持。
20年了，六四未能平反，尊子說得平靜，「歷史就係咁，好正常，好多力量互相牽制、角力，要推翻一樣嘢唔係一朝一夕，就算平反咗，仍然有好多古仔要講。」
「共產黨改變緊」
他說內地關於六四的漫畫不多，即使畫的亦很隱晦，「佢哋都好了解自己嘅局限，我哋都冇理由要求佢哋做烈士、俾人拉。」民運後幾年，尊子曾與家人到內地旅遊，導遊也有提及大學同學在事件中受傷，「佢哋知道但係又做唔到嘢，為咗個心安樂啲，未必咁願意去講。」
故此，他認為香港人應該負更大責任，「香港人更加要努力啲，成個中國嚟講，香港算係有啲自由，你唔去幫佢，仲幫人掩飾，好唔應該，做得幾多得幾多，有時間、金錢就盡量做，話好大成績就唔使，最緊要按自己能力同位置，唔係要得到啲乜嘢。」
他又勉勵港人：「共產黨嘅存在係事實，佢改變緊亦係現實，佢自己腐爛係有可能，將來變成點，靠我哋努力。」
