資金氾濫，港股炒到飛沙劈石，散戶若然定力不夠，見到身邊股友賺錢似乎好易，就會受市況迷惑，人話炒乜，你就炒乜。
家陣股海熱鬧到癲，主要係氣氛造就，好多時並非股份質素及盈利改善，所以散戶現階段揀股可以稍為隨便些，唔使太嚴格，只要有錢湧到激起成交，有關股份便可以升到開巷。
「仙股」係近期股友炒作焦點，昨日輪到福邦（1041），股價爆升22%，收報0.022元。早前台閩概念股熱爆，福邦算係最落後，該股升浪剛起，有機會炒上0.03元水平。
中亞能源回氣再上
日前推介的中亞能源（850），升抵0.30元後略見回吐，股價昨日又見動力炒上，呢一鋪再炒上，料可升見0.35至0.40元，可設止蝕位跟進。
中航科工（2357）本月初曾公佈附屬公司飛機定單減少，惟有關消息無礙股價走高，昨更急升近13%，升破52周高位1.71元，收報1.87元；升勢似有餘未盡，2元大關指日可待，若見股價回試1.70元水平可買，跌穿1.40元止蝕。
方星俠