食衞局局長周一嶽日前透露有「邋遢會議員」如廁後唔洗手，有人向八方報料，指污糟鬼屬建制派中人，白鴿黨高達噚日再爆料，指綜合多名證人供詞，疑似污糟議員辦公室位於中環政府合署西座四樓，特徵係戴眼鏡兼頭髮稀疏。
大家按圖索驥，揣測可能係民建聯黃定光，不過佢誓神劈願話自已好衞生，「如果唔乾淨，老婆都踢我落床啦！」民建聯呢鋪水洗唔清，黨主席譚耀宗嚴正表示自己做議員多年，未曾喺廁所見過周一嶽，為免外界以為民記議員身有嘢，佢要求周一嶽講明邊個議員咁唔衞生，何秀蘭亦要求局長盡快通報「疫情」，工聯會黃國健更話，如果官員唔交代，不排除趁今日特首答問大會，當面質問煲呔。