維景酒店解封，傳來喜來登酒店有來自美國嘅人客疑似中招嘅消息，好彩驗過冇事啫，否則又有一場大龍鳳，忙壞醫護人員，禍延本地旅遊業。
星期一食晏，在座有熟悉醫療及公共衞生人士醫生C，佢話成都與台灣已有確診甲型流感H1N1個案，香港實在防不勝防，幾驚香港好似車路士咁，阻止巴塞射門九十三分鐘，但在第九十三分半，就畀巴塞射入龍門，打守勢波實在好花精神，不能一刻鬆懈，但香港係國際城市，旅客來往頻繁，要阻止墨西哥人帶來流感就比較容易（例如中國禁止飛機來往墨西哥），但目前美國已成為最多豬流感確診個案嘅國家，有三千多宗，佔全世界一半，成為甲型流感輸出國，日本人、內地學生嘅流感都係坐美國飛機所致。世衞組織敢唔敢宣佈美國為疫國呀？中國敢唔敢宣佈停飛所有中美航機呀？答案好肯定：就係唔敢。一旦封鎖美國，世界經濟點承受得住？政治責任誰人負責得起？醫生C話據聞墨西哥已乾脆不再測試甲型流感，美國加拿大啲專家話甲型流感殺傷力不強，當為一般流感，一啲都唔緊張。弊就弊在美加醫藥齊備，患上此症，除非另有併發症，不似有生命危險，故此美加不在乎，但若果美國人將甲型流感帶往人煙稠密、醫療設備不足嘅新興國家，殺傷力就會大好多呢！大家去美加旅行，要認真留意至得，適逢現已踏入美國大學畢業季節，唔少家長正準備赴美，去還是不去？認真頭痛。
惡佬明聽見喜來登住客「有事」，向班老友提出緊急呼籲，唔好去任何酒店食餐，以免一個唔好彩，碰上此症，畀特區政府隔離。使唔使咁驚呀？惡佬明話：「唔好拗頸呀，君子不立危牆之下！」咁啱大記者知道有一位外國報紙特派員曾在墨西哥人checkin維景之夜，在維景酒店吃飯，好彩走得快，而墨西哥人冇到過餐廳，所以唔使隔離，如果真係碰上，只能嘆一句唔好彩！雖然如果被困在酒店內，特區政府會照顧周到，搵埋你的公僕清潔工為你清潔房間，好食好住，但有邊個想暫時失去出入自由吖。